“A najdraže mi je bilo čut kad je jedna moja susida pripovidala fabulu filma svojoj prijatejici. ‘On ti je niki dišperadun, bez alata i zanata, nikor i ništa, a trevi ti on na ulici niku malu ludastu šupjaču kojoj more bit i otac. I ča ćeš ti vidit, sestro moja, posli pet minuti on ti je, bogami, opali.’
‘Oo, mogu mislit koji je to fini svit.’
’Ne moš od dragosti.’
’Bit će slatkojustan pa je smanata besidan?’
’Ma ča slatkojustan? Nije njanci otvorija justa, nego samo za beštimat. Progovorili nisu, nego se on izbeštima i onda su ti se, sestro moja, svukli goli golcati i on je vika ka vol, ona mukala ka krava, stenjali su, puvali, lajali ka pasi…’
’Puno lipo, poučno, sad kad je počela skula mogli bidu profešuri u kina i dicu vodit’.
’Čekaj malo, još nije ni počelo! I ča ćeš ti sad vidit? I kad je on učinija svoj posal, narika se i nalaja, trka je doma, a u kući mu leži mrtva žena na mizi’.
’Misusovo sveto.’
’E na mizu. Žile je pririzala!’
’Ma kud je pri doznala?’
’Ča doznala?’
’To da je on iša za ton malom šupjačon.’
’Ma nije doznala, kako će doznat kad se ona pri ubila. I ni se ni oladila, a on već s drugon. I ča on nije sve toj mrtvoj ženi, nad mizon, izgovorija? To je bilo, sestro, ježivo. I laživice i kurbetino i prasice i sve najgore.’
’Onda je to lud čovik?’
’Da lud? Stoposto lud! A najgore od svega je jopet da je sve to bila istina jer ona je jemala jubavnika. I on se onda sasta s tim jubavnikom ka s prijatejon i lipo su sidili, ćakulali, pili.’
’Ajme baši fondi! To bi sve tribalo polit petroljen i zapalit.’
’I ča ćeš ti sad vidit, sestro moja? I dok žena leži na mizu on bi svaki čas trknija do svoje šupjače i udri Jovo nanovo! I promisli: maslon jon je guzicu maza da mu popuzne.’
’Nikad to nisan čula. Ajme beštij, ajme Sodome i Gomore! Di neće vrag cili svit odnit kad se maslo počelo i za to duperat?’
’I onda u zanju, ča ćeš ti vidit, sestro moja? Posli ti pusti fatureti…’
’Je li bar iša ženi na sprovod?’
’Ma ke, ona je ležala na mizu.’
’Onda, koliko tamo držidu mrve bez ukopa.’
’A ča ja znan? Dakle, posli ti pusti fatureti, nij ti dvoje pojdu vanka i niki lokal, naločedu se, opijedu ka sipe, na noge nisu mogli stat. I u jednu salu di se balalo padali su, nerali, on je nju za nogu vuka po palketu i kad ji je jedna gospoja došla potirat on ti kala gaće i svi ji u salu fotografa.’
’Ola i takvoga edukacjuna!’
’A ta njegova šupjača se jema bit zasramovala i počela je bižat, a on trk za njon. Kad je uvatija, počeli su se jubit i dok su se jubili ona izvuće livorver i opali mu dva tira u trbuj.’
’Ubila ga je?’
’Da ubila? I ča ćeš ti vidit, ča je onda učinila? Omar je zvala policjote i govori nin da ga ne poznaje, da ga nikad ni vidila. Jema bit da je bija lud, govori, i napa me, tija me silovat.’
’A ča ćeš, kurba jema riči i oči.’:-)